Баян-Өлгий аймгийн Буянт сум нь БНМАУ-ын Бага хурлын тэргүүлэгчдийн 1942 оны 06 дугаар сарын 11-ний өдрийн 32 дугаар тогтоолоор анх байгуулагдаж байсан.
Сумын төвийг нь "Буянтын төв" гэж тогтоож захиргаа, намын үүр нь "Хоёр хөх" гэдэг газар 2 цагаан эсгий гэртэйгээр үйл ажиллагаагаа явуулж эхэлсэн байдаг.
Өнөөдөр Буянт сум нь нийт 183221,3га нутаг дэвсгэртэй, Бугат, Толбо, Алтай, Сагсай сумдтай хиллэдэг, сумын төв нь Улаанбаатараас 1820км, аймгийн төвөөс 75км зайд алслагдан оршидог 682 өрх, 2882 хүн амтай, 125500 толгой малтай, жилдээ 2 тэрбум 800 сая төгрөгийн орлого, зарлагын санхүүжилт хийгдэж, 112340,0 төгрөгийн татвар хуримталуулдаг, 4 баг /Хөх эрэг, Хөлцөөт, Өмнө гол, Шар тохой/, төсвийн 5 байгууллага /ЗДТГ, ЭМТөв, Соёлын төв, цэцэрлэг, сургууль/, 6 жижиг, дунд үйлдвэр /эсгий, эсгий эдлэлийн 2, талх нарийн боовны 2/, 16 хоршоолол /хувийн мал эмнэлгийн чиглэлийн 5, малчдын 5, бусад аж ахуйн газар 5/, банкны 2 салбар, шуудан холбоо, эрчим хүч, буддын болон мусулманы шашны 2 сүм, хийд тус бүр 1, 20 дэлгүүр, 8 гуанз, цайны газар, 7 засвар үйлчилгээний газар, 3 ШТС, нийт 40-өөд байгууллага, үйлдвэр аж ахуйн газар үйл ажиллагаа явуулдаг бөгөөд байнгын ажиллагаатай эрчим хүчний эх үүсвэртэй холбогдсон, гудамж талбай, албан байгууллагууд нь зохих хэмжээний ногоон цэцэрлэгжүүлэлт, шөнийн гэрэлтүүлэг, зам талбай, байнгын ажиллагаатай төв суурин болон хөгжиж байна.
